توقع الأسوء

توقعت الأسوأ ..

توجهنا بالأمس من البحرين مع شله من الربع للدمام كشته خفيفه بنص الويك اند تفاديا لعجأة الحدود على قولة أهل بيروت :) .. المهم قعدنا عالطعس والهوا البارد يكفخ وريحة الشبوب تبخر الدشداشة والسوالف حامية .. بالرجعه قبل الدخول للبحرين توقفنا عند محطه لتلبية نداء الطبيعه .. بعد الدخول للبحرين واحنا نص الليل اتفقد البي بي حقتي ماني لاقيه :) .. يمين يسار مو موجود .. عفسنا السيارة ما لقيناه .. قلنا 95% الموبايل بالسيارة مدعوس و 5% طاح منّي بالمحطه وكنا نتمنى ان ما يكون الخيار الثاني .. لأن من له خلق يرجع السعودية والمرور عالحدود والجمارك مرة ثانيه !! ..

قلنا أمرنا لله .. واحنا رايحين والتثاؤب يملأ الوجوه من التعب .. تذكرت اني قبل شهر مضيّع بوكي وكان فيه كل بطاقاتي ودنيتي وقوّمت الدنيا وقعدت ما لقيته ، وعلي ما أسوّي بدل فاقد لكل بطاقه طلعت روحي .. وقبل شهرين القاري اللي شاريه انباق من حارس العمارة -حسب توقعاتي- .. مما يجعلني طول الدرب للمحطة المنشودة أفكّر بالموبايل القادم من أين سأشتريه ؟ و كم سعره ؟ وما نوعه ؟ هل هو بي بي أم آيفون ؟ ..

لدرجة اني قاعد اكسّر حساباتي خلاص على أساس ان الآيفون سيكون البديل ولازم ايمّعله بيزات ... قلت خلاص لازم افرز لي 250 دينار حق الآيفون .. ولا كلش كلش 100 دينار واشتري بي بي ثاني ..

وصلنا المحطة دوّرت مكان السيارة ما لقيناه !!

سألنا راعي المحطة ما لقيناه !!

واحنا راكبين ولا راعي البقالة ياي يتبوسم .. قالي شنو في ؟! قلت له ما شفت موبايل طايح ؟؟ .. قال شنو لونه ؟؟؟ لوووول يعني أمين الأخ يسأل اذا صج اهو اللي عنده عشان يطلعه .. قلت له أسود ويطلعه من مخباته ايواا ايواا ..

المهم لما رجعنا البحرين اكتشفت ان الشاشة تشب اضاءة بس بدون شي ،، يعني ساده .. الظاهر من الطيحة صار فيها شي .. رحت محل التصليح قال الشاشه خربانه ..

بجم التصليح ولد عمّي .. قال 45 دينار ،،

قلت توكل علي الله صلّح ، بدون لا أكاسره أو حتي أسأل سعر المحلات اللي يمه !!

لووووول أحس ان 45 صارت ولا شي مقابل المبلغ اللي كنت بقطه علي جهاز يديد ..

كثير من الناس يتخذ من أسلوب تفكير "توقع الأسوء" لتأتي النتيجة خلاف توقعه ويخرج بشعور positive

في الانتخابات .. في الامتحانات .. او حتي في جمرك السعودية :) نتوقع ان الزحمه بتدبسنا ساعتين .. فنخرج بساعه مع انها طويله لكنها اقل من المتوقع :)